Энээн тухай декабриин 12-то Засаг-Газарай брифинг дээрэ Буряад Уласай Байгаалиин нөөсэнүүдэй яаман сайд Юрий Сафьянов дуулгаба. Тэрэнэй хэлэһээр, Ородой Холбоото Уласта 2017 он «Ариг сэбэрэй он» гэжэ соносхогдобо, тиимэһээ энэ талаар бэрхэшээлнүүдые шиидхэхэ хэрэгүүдые хараалһан зарим тэды хэмжээ ябуулганууд гүрэн түрын хэмжээндэ зохёогдонхой. Тэрэ тоодо манайшье нютаг оролсоно.

Уласаймнай талаһаа дүн хамта 85 сая түхэригэй 18 хэмжээ ябуулга түсэб дотор оруулагдаба. Тодорхойлбол, Байгал далайе хамгаалха талаар гүрэн түрын заршамаар хараалагдаһан ажалнууд, Холбоолжоной уурхайе үгы хэхэ талаар ажаябуулганууд, Стеклозавод оршондо газарта доро нефть хадагалалгые усадхаха гэхэ мэтын ажалнууд удаадахи гурбан жэлэй туршада ябуулагдаха түсэбтэй, - гээд Сафьянов тэмдэглэбэ.

Тэрээнһээ гадуур 2017 ондо республика дотор хатуу хаядаһа буйлуулан хадагалха гурбан полигон баригдаха. Сафьяновай үгөөр, үни хада усадхагдахаар болоһон Хойто Байгалай шадархи сэбэрлэлгын түхеэрэлгэнүүдые һэльбэн шэнэлхэ түсэлнүүд зохёогдоотой. Энэ талаар хойто жэл Буряад Уласай Барилгын яаманай үмэнэһөө энэ хэрэг бэелүүлгэдэ тусхай ажал ябуулагдаха, харин 2018 ондо одоошье гүрэн түрын зүгһөө мүнгэ татажа туршаха һанамжа бии.